مجددون

السلام عليكم ورحمة الله وبركاته

برنامج مجددون للداعية الأستاذ عمرو خالد

الاستاذ عمرو خالد وإن اختلف الناس في تقييمه وفي أسلوب كلامه ودعوته و .... إلخ
فانا النهاردة مش جاية اتكلم عن كده
الموضوع بعيد تماما عن رأيي ورأيك ورأي غيرنا في الأستاذ عمرو خالص

النهاردة أنا عاوزة أتكلم معاكوا عن برنامج مجددون

مقدم البرنامج هو الأستاذ عمرو خالد
وكان مشارك في البرنامج 8 مجددون شباب و8 مجددات بنات من 9 دول عربية مختلفة تم اختيارهم على أسس معينة

دارت الحلقات حول 13 مهمة كل مهمة مدة تنفيذها 3 أيام
اختلفت المهمات من اصلاح دار أيتام لإنتاج فيلم قصير هادف لإحياء قضية الأقصى لتزيين ونضافة الشوارع للرياضة وغيرهم من المهمات
إلى أن انتهت بالحلقة الأخيرة عن المشروع الذي سيتم تنفيذه بالجائزة المالية ال 100000 يورو

بدأت الحلقات ب 16 شاب وفتاة وانتهت بشاب واحد وفتاة واحدة
الحلقة الحاسمة والأخيرة من برنامج مجددون بين معالي فقيه من السعودية وخالد دياب من مصر

اللي تابع برنامج مجددون

اعتقد ان كل مهمة من المهمات خرج منها بفوائد كثيرة وأثرت فيه تأثير من أي نوع

اتعلمت كتير من البرنامج ومهماته ال13
شوفت ناس بيضيع منها حاجات كتير وبتلحق نفسها في آخر وقت وبتنجز حاجات كتير جدا
شوفت ناس بتتعب جدا جسديا وذهنيا بس بيصروا على الوصول للفوز في كل مهمة
عرفت ان فعلا مفيش حاجة مستحيلة
وان كل واحد جواه طاقة كبيرة جدا وجهد كبير جدا بس للأسف مدفون

اتمنى نكون مبنتفرجش وبس
اتمنى كل واحد يدور جوه نفسه ويشوف هو يقدر يعمل ايه
ويعمله وميبخلش على نفسه وعلى الناس والمجتمع اللي محتاجه
امنى ان انا اكون اتغيرت بعد ما شوفت نجاحات كتير وشوفت ناس بتتخطى العقبات مهما كانت صعوبتها
اتمنى ان انا وانتوا نقدر نتنازل شوية عن راحتنا في سبيل عمل مفيد مش شرط يكون عمل خيري
عمل يفيدك ويفيد غيرك

عجبني جدا اسم البرنامج وان الهدف الرئيسي منه ان في كل مهمة تكون فكرة التنفيذ فكرة مجددة
لان التجديد حاجة مهمة جدا في حياة كل واحد فينا وبتفرق معاه في نشاطه وفي شغله

كان في تفاهم كبير بين أعضاء كل فريق في معظم المهمات
كل شخص في الفريق همه هو فوز الفريق بشكل أساسي في المهمة

فعلا البرنامج كله كان مفيد جدا وممتع جدا
وكنت زعلانة اوي ان دي كانت أخر حلقة
وان شاء الله هتابع حلقات الموسم التاني

أكيد البرنامج كان في سلبيات ومخالفات
بس انا الهدف من موضوعي ان كل واحد يوضح إيجابيات البرنامج من وجهة نظره
ومدى استفادته منه
السبب اني مش هكتب السلبيات انها حاجات تم مناقشتها قبل كده اكتر من مرة
عاوزين بقى نتناقش في الايجابيات

في النهاية :-
آخر حلقة كانت بين معالي فقيه وخالد دياب
وكان مطلوب من كل واحد يعمل عرض كامل وتصوير للمشروع اللي هينفذه لو كسب الجايزة بتاعة البرنامج
انا مقولتش مين اللي كسب في الاتنين عشان لو حد متفرجش ع الحلقة لسه
في رأيكوا مين المشروع اللي كان يستحق ان هو يكسب في المشروعين ويتنفذ على أرض الواقع
مشروع خالد دياب ( ورق )
ولا مشروع معالي فقيه (مؤسسة مجددون لدعم وتنفيذ المشاريع الشبابية )

يعني بأمانة بعد ما كل واحد عرض مشروعه
وقبل ما يعرض أستاذ عمرو خالد النتيجة
كنت متوقع مين يكسب أو بمعنى أصح بعد ما شوفت شغلهم لو كان مطلوب منك تقيم الفائز
كنت هتختار انهي مشروع من الاتنين ؟؟

اتفرجت علي الحلقه

بالنسبه كنت اتوقع مين فانا بالفعل كنت عارفه مين اللي كسب
بس انا شايفه ايه ؟
شايفه ان خالد فكرته مجدده اكتر يعني متعملتش قبل كده
و فعلا مفعولها هيوصل لكل العالم العربي
و حاجه كمان خلتني اقتنع بفكرته اووي فيلم اخر ايام الارض
الفيلم ده اثر في جدا وفيه فكر و استفدت منه اووي و اتمنيت لو في افلام كتير من النوعيه دي
و يااا رب مشروعه ينجح و يحقق نجاح كبير

بالنسبه لمعالي الفكره لا غبار عليها بس جزء منها كبير موجود او اتعمل قبل كده
دراسه الجدوي اللي عملتها راائعه و البرزينتيشن كانت هايله
كنت شايفه انها تعمل مشروع بعيد عن مجال عملها نقطه تؤخذ عليها زي ما قالها عمر خالد
ثقتها بنفسها وايمانها بمشروعها ابهرني

و ان شاااء الله هتابع السيزون التاني


بالمناسبه اي حد عايز حلقات البرنامج كلها ممكن اجيبهاله
بجد برنامج يستحق المشاهده

شكرا يا هند علي الموضوع