الرئيسية
انا شفت الموضوع ده فى مكتبة الاسكندرية و طبعا احنا ما سمعناش عنه فى وسائل الاعلام بتاعتنا عشان احنا دول ............ انتم عارفين
و لولا ان مكتبة اسكندرية مشاركة فى الموضوع ده ما كنتش سمعت عنه خالص
المهم الموضوع ان فيه عالم فرنسى اقترح فكرة هى ممكن تبقى جنونية شوية بس مفيدة لاقصى درجة
فرنسا هتعمل قمر صناعى جديد اسمه
"KEO"
و ادى صورته
القمر الصناعى ده هيعمل ايه ؟
ارجوكم صدقوا الموضوع لانه ممكن يبقى خيالى شوية
القمر ده هيفضل يدور حوالين الارض 50000 سنة ان شاء الله لو يوم القيامة ما كانش لسه جه
طبعا هتقولوا ليه؟
هسهلكوا الموضوع
انتو تعرفوا ايه عن الناس و الشعوب و اجدادكم اللى كانوا عايشين من 50000 سنة ؟
طبعا ما تعرفوش حاجة
تعرفوا ايه عن عاداتهم و تكنولوجيتهم و شكلهم و الحاجات دى كلها ؟
ما تعرفوش
طبعا احنا نعرف عن الفراعنة و الرومان و الناس دى بس مش بالدرجة الكافية
طب تصوروا لو لقينا فجأة ان فيه مصدر يعرفنا كل حاجة بالصور و الكلام المفصل و اللى كاتبينه كمان هما الناس اللى عايشين فى العصر ده
طبعا هيبقى فيه فرق
هو ده هدف القمر
العلماء هيحطوا فيه كل المعلومات اللى يقدروا يجمعوها عن كل العادات و
التكنولوجيا و الشعوب و الحاجات دى كلها و هو ده دور مكتبة الاسكندرية
و هيبعتوه فى الفضاء 50000 سنة و بعدين يرجع الارض تانى لوحده
عشان الناس تلاقيه و يعرفونا اكتر
طب اشمعنى 50000 سنة؟
عشان العالم الفرنسى اللى فكر فى المشروع لقى ان بعد 50000 سنة هتكون الناس نسيت كل حاجة عننا
طب هيشتغل ازاى؟
القمر ده مش هيبقى فيه اى جهاز الكترونى او كهربى عشان لو اتحللوا الدروع
اللى حوالين القمر اللى هتحميه من النيازك و الحاجات دى ممكن تبوظ
طب ليه هيطلع فى الفضاء و ما يدفنوهوش فى الارض اامن؟
عشان الفضاء بيناسب طموحات الانسان و كمان لما الناس يلاقوه نازل من الفضاء هيهتموا بيه اكتر
طب و ليه شكله كده؟
اولا الكرة عشان محفور عليها شكل الكرة الارضية عشان العلماء اللى
هيلتقطوه يعرفوا انه جاى من الارض مش من كواكب تانية اما الجناحين لنفس
السبب اللى فى السؤال اللى قبله عشان هى بتناسب طموحات الانسان و كمان
عشان هى اللى هتحركه
هتقولوا طيب و الجناحات هتتحرك ازاى من غير طاقة؟
العلماء عاملين الجناحات دى من مواد معينة ليها خاصية مدهشة انها لما
بتتعرض لدرجة حرارة منخفضة بتنزل لتحت و لما بتتعرض لدرجة حرارة اكبر
بتطلع فلما القمر هييجى فى ظل الارض الجناح هينزل لتحت و لما يطلع فى نور
الشمس هيطلع لفوق و بكده هيقدر يرفرف
طب هو هيبقى فيه ايه و احنا دورنا ايه؟
و هو ده السؤال المهم فى ده كله القمر هيبقى فيه ست حاجات :
1- شكل الكرة الارضية هيبقى محفور على القمر و انا شرحت السبب ده
2- صور لرجالة و ستات و اطفال من مختلف الاماكن و العصور لغاية دلوقتى
عشان لو الناس بعد 50000 سنة شكلها اتغير يعرفوا احنا كان شكلنا ايه
3- و ده دور مكتبة الاسكندرية و ده طبعا فخر لبلدنا - بس هنفخر بيه ازاى و
الحاجات دى ما بتتذاعش فى الاخبار- ان مكتبة الاسكندرية هتحط معلومات عن
مستوى التنمية و المعرفة و العادات و المعتقدات و و حالة الكوكب و
المخلوقات الحية و انواعها كما نعرفها اليوم كل ده على اسطوانات دى فى دى
4- كريستالة فيها تلات حاجات : قطرة من ماء البحر و عينة من الهواء و التربة و قطرة دم بشرية عشان برضه لو الحاجات كانت اتغيرت
5- ساعة فلكية عشان العلماء بعد 50000 سنة يعرفوا هو القمر طلع من هنا من امتى
6- و دى المهمة بالنسبة لنا لان ده اللى هنشارك فيه ليه
لان كل واحد مطالب بانه يكتب رسالة لا تتجاوز 4 صفحات عشان الناس بعد 50000 سنة تقراها و مسموحلك تكتب اى حاجة
اكتب عن افكارك عن نفسك عن حياتك عن دولتك عن اى حاجة ممكن تفيد الناس بعد كده
طب ليه 4 صفح بس عشان العالم بيطالب كل اللى سمع عن الحكاية دى يلم من كل
معارفه رسايل حتى اللى ما لهمش فى الكمبيوتر و الاميين و الغلابة و كل
الناس
بصراحة العالم عاوز ال6 مليار بنى ادم اللى على الارض يشاركوا و هو ده اللى انا كتبت التوبك عشانه
و على فكرة مش مسموحلك تكتب غير كلام بس عشان المساحة يعنى ما ينفعش صور او كده
و مفتوحلكم الكتابة لغاية اخر 2008 عشان بعد كده هيكون القمر كمل ان شاء
الله و هيطلع و بعد كده هنفقد الاتصال بيه نهائيا عشان زى ما قلت انه ما
فيهوش اى اجهزة
و بعد ما يطلع ممكن تشوفوا كل الرسايل اللى اتكتبت ده طبعا بعد ما يمسحوا اسامى الناس اللى كتبت الرسايل
بس كده خلاص
ارجوكم يا جماعة شرفونا و خلوا كل معارفكو و قرايبكم و اصحابكم يشاركوا
و اللى عاوز يكتب الرسالة او لو عاوز يبعتهم على البريد العادى او عاوز
يعرف معلومات مفصلة اكتر او اى حاجة يدخل على الموقع الرسمى للمشروع
KEO
و اللى عاوز ملف شرح بالعربى
اهه
هنا
و شكرا علي الاهتمام
انا بس حبيت اعرفكم عشان انتو شباب هتهتموا بالموضوع و ترفعوا راس العرب بالمشاركة
بس يا جماعة ارجوكم بلاش الكلام اللى ما لوش لازمة فى الرسايل اصل انا عارف المصريين
معلش انا عارف انى طولت عليكم
بس اللى عاوز يسال فى اى حاجة يقولى هنا
