اسئله يوم الخميس

نور القلب كتب:

سبحان الله يا إيمان بجد .. لسه كنت بفكر انا وكات كات ليه مبقاش فيه أسئله بتنزل

وأسئلتك حلوة اوي عشان كده هجاوب عليها


ماهو العهد الذي تقسم بانك ستقوم بحفظه على مدى الزمان؟

اممممم .. مش عارفه بس اي حد بيقولي سر ويطلب اني احافظ عليه

أكيد مش بيطلع بره خالص ولا حتي في تفكيري .. تقدري تقولي اني حافظة أسرار معظم صحابي

ما هي اعظم هدية تلقيتها من مدرسة الحياة؟

أعظم هديه في حياتي أكيد بابا وماما بجد بحمد ربنا اني ليا اب وام كده

ويا رب يخليهم لينا ويكرمهم يا رب ويجعلنا بارين بيهم دايما

جملة سمعتها مرة واحتفظت بها في قلبك؟

هما اتنين الصراحه واحده من مدرس ايام ثانوي

" لا تحسبن المجد تمرا أنت آكله .. لن تبلغ المجد حتي تلعق الصبر "

والتانيه

" كن النخيل عن الأحقاد مرتفعاً . . يرمى بالصخر فيُلقى بأطيب .الثمر "

متى تسكب كتلة مشاعرك واحاسيسك المدفونة بداخلك على الورق؟

كتيييير جدا بسرح مع نفسي واكتب حااجات انا حاساها وموجوده جوايا انا بس

ومش بخلي حد يشاركني فيها ..

ماذا تفعل عندما تقفل الايام ابوابها في وجهك ؟

بلجأ لربنا وبدعي بجد من قلبي .. لان في النهايه ربنا بس الي بإيده كل حاجه تخصني

فالاقرب اني اهرب للي خلقني وعارف انا محتاجه ايه وايه تاعبني وايه هيريحني


هل انت مجامل ؟يعنى ممكن تكون مش طايق حد وبتكلمه عادى جدا ؟ولماذا؟

مش بجامل دايما بصراحه , ومش كل الناس الي اقدر اجاملها

بس كمان مش بحب اصدم الي قدامي .. برأي ممكن يجرحه

مش عارفه بس بجد بيبان عليا اوي لو بجامل حد وانا مش طايقاه

لديك مصباح علاء الدين ثلاث أمنيات أطلبها ؟؟

أول أمنيه : ربنا يرضي عني وأموت وانا قريبه جدا من ربنا وبتمني أموت شهيده

ثاني أمنيه : ربنا يخلي ليا ماما وبابا ويبارك فيهم لينا ويديهم الصحه والسعاده

ثالث أمنيه : اوصل للي بحلم بيه دايما وربنا يوفقني فيه

( سواء مستوي أعلي في الشغل او في جواز او .. حاجات كتيره )

هل فكرت يوماً للأنسحاب من المنتدى ؟؟ لماذا؟؟

الصراحه وللأسف ايوة فكرت من يومين بس

وده لأسباب واضحه جدا ومعروفه للجميع وأتمني انها تتعالج

لأن لسه قراري تحت الدراسه

ما هى افضل طريقه فى نظرك لكى تصبح عضو مميز؟

أفضل طريقه بجد لاني اكون عضو مميز ومحبوب للجميع

هيا الرد الكويس علي الكل واحترام القوانين و الاعضاء واحترام نفسي اولا

واني ابعد عن ايذاء الاخرين بالردود المستفزه والي ملهاش لازمه

واني اخد من كل قسم حاجه تفيدني بجد واتعلم منها

هل الشخص الاكثر دموعا فى المواقف البسيطه اقل دموعا فى المواقف الحقيقيه؟؟؟

بالعكس تماما .. الشخص الي بيبكي في المواقف البسيطه ده شخص حساس جدا

واي حاجه ممكن تخليه يبكي وانا بحب النوع ده جدا من البني آدمين لأني بحس انهم شفافين جدا

ومش بيعرفوا الخداع او النفاق

ما هى افضل طريقه للدعوه الى الخير؟

أفضل طريقه لما ادعوا للخير .. الكلمه الطيبه وبعدها الفعل الطيب

يعني اقول نصيحه او دعوة واعمل بيها قدام الي بنصحه ده

واللين في التعامل ده سحر بيخلي اي حد ينجذب لكلامك و يعمل بنصيحتك علي طول

وماذا تفعل اذا نصحت شخص كذا مره وقابل النصح بالاساءه؟

بصراحه بسيبه براحته طالما مش بيسمع النصيحه يبقي مش هتعب نفسي

بكتفي اني اعمل الي عليا و اقولها واوصلها وخلاص

وهو ليه حرية العمل بيها

هل استطاعت يوم ان تجمع عيوبك ومميزتك (هل عرفت نفسك حق المعرفه)؟؟

ايوة انا عارفه عيوبي جدا واكتر من مميزاتي

ودايما بحب أسأل الي حواليا عن انطباعم عني واشوف ايه مميزاتي وايه سلبياتي

وبحاول كتير اغير من نفسي

لو اهديت سفرة عبر الزمن إلى أي زمن ستسافر الماضي أو المستقبل ؟؟ لماذا؟؟


لاء هسافر المستقبل أكيد .. عشان الماضي عدي خلاص وعرفت اللي فيه

ومر بحلوه ومره .. فأكيد هيبقي نفسي أعرف المستقبل شكله ايه

شكرا يا ايمان علي الأسئله الخفيفه الحلوه دي

ومستنييين منك المزيد يا قمر

أسئله حلوة اوي يا سمسمه

بس بصي انا عندي زهيمر أصلا

واكتر حاجه ممكن انساها التواريخ والأسامي

انما الحمد لله مش بنسي الملامح

فا انا هجاوب الي فاكراه والي مش فاكراه بقي هستعين بصديق

يلا بسم الله نبدأ

KatKat كتب:

1-
ماهو افضل تاريخ بالنسبالك

ان شاء الله هيبقى يوم التلات

12/8/2008

زي كات كات كده بالظبط

ان شاء الله يوم

12/8/2008

2-
ما هو اسوء تاريخ بالنسبالك

انا مش فاكره بس كان يوم نتيجتي في تانيه ثانوي برده

3-
فاكر تاريخ مشاركتك فى المنتدى
من غير الرجوع لملفك الشخصى

كان في شهر فبراير كام بقي مبصتش زي ما قولتي

بس كان تحدي عشان واحده كده ربنا يسامحها

مكنتش بتديني الأكونت بتاعها عشان أدخل بيه

, فانتهزتها فرصه وهيا مسافره وسجلت

4-
افضل سنة فى حياتك

كتير سنين حلوة الحمد لله في حياتي

بس أحسن سنه بجد كانت سنه رابعه كليه مش هنساها ابدا


5-
رقم تمانية بمثلك حاجة ولا مجرد رقم

أغسطس والجو الحر

وعدد أسئلتك الحلوه دي يا سمسمه

يااااه مشوار لحد ما أوصل للسؤال 8


6-
ماذا حدث فى مثل هذا اليوم السنة اللى فاتت لو فاكر

امممممممم

مثل هذا اليوم مش فاكره الصراحه بس فاكره

5-8

عيد ميلاد أختي الكبيره مورا ربنا يبارك فيها يا رب

7-
ماذا تتمنى ان يحدث فى هذا اليوم؟؟؟ كما هو ؟؟؟ام شى اخر؟؟؟

لاء عايزاه زي ما هو عشان افضل فاكره عيد ميلادها

KatKat كتب:
8-
ماذا تتمنى ان يحدث السنة اللى جاية ان شاء الله فى يوم
9/9/2009

أكون عرفــــــــت

ههههههههههه

مش لما أعرف انا الأول يا رخمه

عادي عادي ان شاء الله في اليوم ده نعرف احنا التلاته انا وانتي ونودي