رحلة علمية لمدينة الاسكندرية

السلام عليكم ورحمة الله

النهاردة ازز ... وانا معدي كده قدام الشئون لقيت الاستاذة بديعة -رعاية الطلاب- بتقولي في رحلة علمية لاسكندرية يومين
للمتفوقين
فقولتلها يا ستي انا مش من المتفوقين دوول
انا بنجح بالعافية

قالتلي تعالى بس وراحت واخداني لمدام اخلاص

وقالتلي التالي
دي رحلة عملية تبع جامعة المنصورة "اذن هي مدعمة" للمتفوقين
يومين ب 50 جنيه
اليوم الاول : الاكاديمية البحرية - وقالتلي انهم محضرين برنامج كويس للطلبة
وبعدين هترجعوا الفندق تتغدوا
وبليل تتفقوا على اي حتة تروحوها .. ونروحها كلنا : سينما - جرين بلازا ... الخ الخ
وطبعا التزاكر عليكم
اليوم التاني : هتروحوا يا اما اكاديمية مبارك للعلوم - او مكتبة اسكندرية
.......
الاكل والشرب والنوم والمواصلات علينا ... على الكلية يعني

برنامج الرحلة .. لسه تحديدا متعملش .. بس اول ما يتحط هبلغكم ن شاء الله

الرحلة دي مدام اخلاص كانت عايزة تطلعها على اخر فبراير -على حد قولها
فالوقت مفيش

فانا نطت في دماغي فكرة ان في حفلة لعمر خيرت في مكتبة اسكندرية يومين 7 و8 مارس

فجه دوري في الكلام بقى
فقولتها دلوقتي احنا كنا هنعمل رحلة اسكندرية يوم 7 مارس علشان نحضر حفلة عمر خيرت
الحدث واسعار التزاكر
هنا
https://www.facebook.com/event.php?eid=310733452973
وكان في ناس معانا من الكلية ومن بره الكلية
فعجبتها الفكرة .. فقالت ماشي ناخد احنا يوم الاحد 7 مارس
والاتنين 8 مارس
ومينفعش حد من بره الكلية .. لانها رحلة علمية .. ومدعمة
و اسعار تزاكر الحفلة دي على حسابكم
قولتها مااااشي خلااااص والله عارف

طيب ايه المطلوب دلوقتي
؟
المطلوب الناس اللي عايزة تحجز طبعا عارفين ازاي

1- الاسم
2- الفرقة .. وطبعا يكون فوق الجيد .. علشان متفوقين بقى
3- رقم الموبايل
4- والفلوس قبل كل الكلام ده

وتطلعوا بيها على فين .. ايون على رعاية الطلاب

واخر معاد للدفع اخر الاسبوع اللي احنا فيه ده

والله يكرمكم .. لو حد راح يدفع من نفسه كده يقولها انه تبعي .. اصلها قالتلي انت المسئول قدامي انك تجيبلي ناااس
وانا مش هنزل غير يوم الاتنين او التلات

فاللي عايز يفكر اليومين دوول ويقابلني في الكلية يوم التلات ان شاء الله .. ويديني الفلوس وبياناته .. اهلا وسهلا
يوم التلات والاربع والخميس انا موجود ان شاء الله
ياريت الناس تفكر بسرعة

وكل رحلة علمية وانتوا طيبين

اه بمناسبة الرحلة العلمية .. كنا في يوم من الايام في سنة من السنين في جمصة
وكان حضرة السيد ا.د. محمد سويلم البسيوني
قاعد معانا في جمصة
فقال ايه بقى .. الجامعة بتشجع الرحلات العملية .. يعني مثلا من كام شهر كلية علوم
عملوا رحلة شرم الشيخ لمدة اسبوع
طبعا رحلة لشرم واسبوع وتكاليف باهظة الثمن .. واسمها رحلة علمية
الرحلة كانت على البحر وشواطئ شرم

وكانوا بيكتشفوا الصخور الرسوبية .. والرمال النادرة الموجودة على الشواطئ

والله الكلام ده بجد ومن الراجل مباشرة
الله يمسيه بالخير .. فطسني من الضحك يومها

فكروا كويس .. واي حد عايز اي حاجة يسأل هنا
او
P.M
سلااااااااام