Photoshop Course

بسم الله الرحمن الرحيم

الدرس الأول

ان شاء الله في الدرس ده هقوللكم بعض الأساسيات اللي المفروض أي حد شغال فوتوشوب يكون على علم بيها و بعض الأدوات اللي هنعرف مع

بعض هي بتعمل ايه و بنستخدمها ازاي

أول حاجة و كالعادة ... في معظم البرامج اللي بتفتحها بتلاقي في شريط قوايم فوق كده أو بنسميه الMenu Bar و عندنا في الفوتوشوب بيكون

زي ماهو في الصورة دي كده

عندنا القوايم دي فيها حاجات برضه مشابهة لبعض البرامج اللي بنستخدمها زي ما في قايمة File و قايمة Edit و Window و Help
المهم القوايم أنا هقول كل قايمة فيها ايه بسرعة كده و لما نيجي نشتغل في ديزاينات هبقى اشرح (بإذن الله) حاجات من اللي في القوايم دي

يلا نشوف القوايم دي بقى فيها ايه و ممكن نستخدمها في ايه:

1-File:
القايمة دي واخدة من معظم البرامج كده ... يعني منها ممكن نفتح ملف و ممكن نحفظ الشغل اللي عملناه أو نقفله أو نقفل الفوتوشوب كله أو نحفظ
شغلنا كصفحة ويب


2-Edit
القايمة دي ممكن تعمل منها Copy لتحديد انت عملته أو Paste أو ممكن تملى تحديد بلون معين و برضه تقدر تتحكم في حجم صورة انت
ادرجتها مثلا باستخدام Free Transform


3-Image
بتديك القدرة انك تتحكم في ألوان الصورة أو درجة غمقانها و ممكن تقلب الصورة في اتجاه عقارب الساعة أو العكس و برضه ممكن تصغر
صورة عندك تخليلها حجم معين انت اللي تحدده


4-Layer
و القايمة دي مخصوص للطبقات أو الـLayers و ان شاء الله هنتكللم بالتفصيل عن الطبقات دي بالتفصيل و ممكن يكون في درس لوحده


5-Select
دي بتساعد لما تكون مثلا عايز تحدد كل حاجة قدامك في التصميم أو عايز تعكس التحديد مثلا و برضه ممكن تحفظ تحديد انت عامله على أساس
تستخدمه بعد كده


6-Filter
جينا بقى للفلاتر ... الفلاتر دي عبارة عن تأثيرات جاهزة بتضيفها على أي صورة انت عايزها و ممكن تعمل Setup لفلاتر انت منزلها مثلا من
النت بس تحطها في المسار الصح زي ما اتكللمنا في موضوع (كيفية وضع الاضافات في الفوتوشوب)


7-View
منها ممكن تغير في شكل وضعية الرؤية سواء كانت Full Screen أو عادي أو غيره .. و برضه ممكن نخلي الملف أو الصورة اللي شغالين
فيها يبقى فيها مربعات على اساس تساعدنا في الابعاد و غيره


8-Window
دي بقى اللي بتظهرلنا الWindows الصغيرة اللي بتبقى على اليمين لما تفتح الفوتوشوب أول مرة و لو عايز تظهر حاجة زيادة أو تشيل حاجة
انت مش عايزها و كده


9-Help
طبعا باين من اسمها يعني انك لو احتجت شرح لحاجة انت مش فاهم بتستخدم ازاي بتعمل عليها سيرش في الهيلب ده و هيطلعلك النتايج



و كده يبقى اخدنا فكرة بس عن القوايم اللي فوق دي ممكن تعمل ايه
و زي ما قلت ان شاء الله هبقى أشرح كل حاجة لما نيجي نستخدمها بعد كده

---------------------------------------------------------

دلوقتي بقى ان شاء الله هنشوف مع بعض القايمة اللي على الشمال أو الTools Menu يعني
(ولو مكانتش ظاهرة ... ممكن تظهرها من window>>tools)
و دي صورة للـMenu اللي اقصدها


ان شاء الله النهاردة هناخد أول مجموعة بس منهم اللي هما ال6 اللي فوق و بعد كده هنشوف الباقي عشان فيهم حاجات بتبقى صعبة شوية لما

تستخدمها لأول مرة
المهم احنا هنشتغل في دول دلوقتي


أول أداه عندنا اللي هي Marquee Tools
لو بصيت كويس هتلاقي ان في حتة سودة صغيرة خالص كده في جنب المربع ده ... و ده معناه انك لو ضغطت كليك يمين بالماوس على الـTool

دي هيظهرلك كذا حاجة تانية غير شكل المستطيل ده
و دي صورة للي هيظهر لو ضغطت عليها كليك يمين

و عندنا هنا 4 أشكال زي ماحنا شايفين ... مستطيل و دايرة و خط بالطول و خط بالعرض

و الأداة دي بنستخدمها في التحديد لشكل معين ... يعني مثلا لو عندك صورة وانت عايز تعمل تحديد لمستطيل في الصورة دي يبقى تستخدم الأداة

بتاعة المستطيل و تحدد الحتة اللي انت عاوزها و بالتالي برضه الدايرة
أنا مش بقول على الاداة دي دايرة ... لا هي بصراحة كده دايرة على حل شعرها .. انما لو ضغطت على Shift و أنا بعمل سيليكت بيها
هتظهرلي دايرة بجد بقى


نشوف بعد كده الأداة التانية اللي هيا Move Tool
الأداة أظن باينة من اسمها ... يعني لو انت مثلا عملت سيليكت و عايز تحرك الحتة اللي انت عملتلها سيليكت دي بتقوم محركها بالأداة دي


الأداة التالتة بقى اللي هيا الLasso Tools
و دي برضه بنعمل بيها سيليكت او تحديد يعني بس طبعا في اختلاف
لما نضغط كليك يمين عليها هنلاقي زي ما في الصورة دي

هنضغط على أول أداة منهم و نجربها على أي صورة كده ... افضل ضاغط بالماوس و حرك الماوس ... و لما تخلص سيب الماوس هتلاقيه عملك

تحديد على الحتة اللي انت مشيت فيها

الأداة التانية بقى بتعمل سيليكت برضه بس لأشكال هندسية يعني مفيهاش curves جرب تستخدمها و لما تخلص تحديد اللي انت عاوزه اضغط

Enter

الأداة التالتة و دي أكتر واحدة بستخدمها في التلاتة ... لو عندك صورة تحديدها صعب شوية بالأدوات اللي فاتت دي ممكن تستخدم الأداة التالتة دي
هي عبارة عن انه بيحددلك نقط طول مانت ماشي و ممكن تتحكم في كثافة النقط دي و على أساس النقط دي بقى بتقدر تعمل تحديد مظبوط زي

مانت عاوز ... و لو غلطت في نقطة مثلا ممكن ترجع ب BackSpace
و لما تخلص تحديد ... ارجع لنقطة البداية و اضغط عليها هيقوم مكمل التحديد


الأداة الرابعة Magic Wand Tool
و دي بررررررررضه بتاعة تحديد بس بتنفع أكتر حاجة لما يكون عندك لون معين عايز تعمل عليه تحديد ... تقوم مختار الاداة دي و تضغط

على اللون اللي انت عاوزه


الأداة الخامسة Crop Tool
و دي بنستخدمها لو عايزين ناخد حتة من الصورة و نحفظها ... نقوم محددين المنطقة اللي عايزين ناخدها و نضغط Enter هتلاقي ان بقيت

الصورة اتشالت

الأداة السادسة ... Slice Tool
و دي بقى بتاعة الويب ... اللي هي بتحدد اللينكات و أماكنها
يعني مثلا ... لو عملنا مستطيل و عايزين نعمل عليه لينك ... نقوم نحدد بالأداة دي المستطيل ده
و نضغط كليك يمين و نختار Edit Slice Options
و نكتب اللينك في خانة الURL و نضغط اوكي ... و لما نيجي نحفظ التصميم نبقى نعمل Save For Web



و ياجماعة عشان يبقى ضميري مرتاح ... في فوق كده تحت الـMenu bar هنلاقي بار زي ده كده

زي ماحنا شايفين تاني مربع من الشمال ... معمول عليه سيليكت
لو وقفنا بالماوس على المربع اللي جنبه هنلاقيه كاتب Add Selection تقريبا ... و اللي جنبها Subtract
المهم يعني على حسب اسم كل واحد في دول هي بتعمل وظيفة معينة
يعني مثلا نفترض اني حبيت أستخدم بتاعة الAdd ... هقوم مختارها
و أروح للتصميم بتاعي أختار مستطيل عادي خالص زي منا كنت بعمل ... و أحاول أختار مستطيل تاني كده هلاقيهم الاتنين ظهروا قدامي ... و

لو متقاطعين هلاقيه دخل الاتنين في بعض كده
و بقيت الحاجات اللي فوق دي بنفس المنظر مع اختلاف وظيفتها بقى

و عندنا الFeather ده لو حبينا نزوده شوية و نعمل سيليكت هنلاقي ان السيليكت أقل بشوية من اللي احنا عملناه
و لو عملنا delete لجزء ... هنلاقيه عمل شوية شبورة كده حوالين الحتة اللي عملنالها ديليت

و بالنسبة للStyle فلو عازين المستطيل ده بحجم معين أو أبعاد معينة تختاروا النظام المناسب لكده

و بس


آسف جدا على التأخير و الإطالة دي كلها
بس حصل حاجة رخمة شوية وهي اني كنت سجلت فيديو بس ماشاء الله كان مالي مركزه شوية (أكتر من 400 ميجا بس) فاطريت أشرح كتابة بقى

و هحاول أشوف برنامج فيديو خفيف شوية عن ده عشان كده بجد انا تعبت و تعبتكوا في القراية


يلا سلاااااااام